jab se un kī mehrbānī ho ga.ī
zindagī ab rāt-rānī ho ga.ī
us ne māñgā zindagī sauġhāt meñ
naam us ke zindagānī ho ga.ī
ibtidā-e-zindagī kī sub.h se
shaam tak puurī kahānī ho ga.ī
rūThnā hañsnā manānā pyaar meñ
zindagī kitnī suhānī ho ga.ī
kho ga.e masrūfiyat kī bhiiḌ meñ
ḳhatm is meñ zindagānī ho ga.ī
maiñ bhī un kā huuñ divāna is tarah
jis tarah 'mīrā' dīvānī ho ga.ī
us ne māñgā zindagī sauġhāt meñ
naam us ke zindagānī ho ga.ī
nā-ḳhudā jab zindagī kā vo 'razā'
paar apnī zindagānī ho ga.ī