ḳhāna-e-zanjīr kā pāband rahtā huuñ sadā
ghar abas ho pūchhte mujh ḳhānamāñ-barbād kā
ishq-e-qadd-e-yār meñ kyā nā-tavānī kā hai zor
ġhash mujhe aayā jo saaya paḌ gayā shamshād kā
ḳhud-farāmoshī tumhārī ġhair ke kaam aa ga.ī
yaad rakhiyegā zarā bhūle se kahnā yaad kā
ḳhat likhā karte haiñ ab vo yak qalam mujh ko shikast
pech se dil toḌte haiñ āshiq-e-nāshād kā
ishq-e-pechāñ kā chaman meñ jaal phailā dekh kar
bulbuloñ ko sarv par dhokā huā sayyād kā
qāmat-e-jānāñ se kartā hai akaḌ kar ham-sarī
hausla dekhe to koī sarv-e-be-buniyād kā
be-zabānī meñ 'amānat' kī vo haiñ gul-reziyāñ
nātiqa ho band ai dil bulbul-e-nāshād kā