maiñ birhā kī naar jise har paanī raas nahīñ
tū ThanDā mīThā hai lekin mujh ko pyaas nahīñ
yuuñ sunte haiñ jaise ḳhvāboñ kī āvāz ho tum
yuuñ baiThe haiñ baiThe hone kā ehsās nahīñ
saare sikkoñ par hai donoñ jānib terā naqsh
aise meñ to jhagḌā hī mumkin hai toss nahīñ
koī jaan se pyārā rishta jab āzār bane
bas thoḌā sā nāḳhun kaaTā jaa.e maas nahīñ
maiñ ne baaġh lagāyā is meñ phuul aur phal to haiñ
duniyā ke talve sahlāne vaalī ghaas nahīñ
koī dhaḌkan jaisā shaḳhs achānak chhoḌe saath
ġhussa kar lenā par apne dil kā naas nahīñ
tū hai mere dil se lipTī phūloñ vaalī bel
ḳhushbū jaisī beTī tū ummīd hai yaas nahīñ
in aadhī bātoñ ne puure sher banā.e haiñ
ab jin ke baqiyā aadhe kī bilkul aas nahīñ
himmat hai to hijrat kar is duniyā-dārī se
ghar ko jañgal kar denā koī ban-bās nahīñ
har ḳhushbū ko un par zaa.e.a hote dekhā hai
jin kī qismat meñ apnī miTTī kī baas nahīñ
ye jo andar girāte rahte haiñ in ko bāñdh
duniyā vo haDDī hai jis par koī maas nahīñ
is lafzī sairābī ko bebas kī chīḳh samajh
kuchh pyāsoñ ko kahnā paḌ jaatā hai pyaas nahīñ