salīb-e-mauja-e-āb-e-havā pe likkhā huuñ
azal se tā-ba-abad harf harf bikhrā huuñ
vajūd vahm mirā ham-safar rahā din bhar
fasīl-e-shām se dekhā to saaya saaya huuñ
sameT leñge kisī din nigāh mausam kī
shajar shajar pe abhī apnā naam likhtā huuñ
chahār samt ghirā huuñ maiñ pāniyoñ meñ yahāñ
mirā ye karb ki ik Dūbtā jazīra huuñ
havā ke saath kahāñ tak uḌaan bhartā huuñ
hudūd-e-jism meñ ik par-kaTā parinda huuñ