maz.hab kī kitāboñ meñ bhī irshād huā maiñ
duniyā tirī ta.amīr meñ buniyād huā meñ
sayyād samajhtā thā rihā ho na sakūñgā
hāthoñ kī naseñ kaaT ke āzād huā maiñ
uryāñ hai mire shahr meñ tahzīb kī devī
mandir kā pujārī thā so barbād huā maiñ
mazmūn se likhtā huuñ ka.ī dūsre mazmūñ
duniyā ye samajhtī hai ki naqqād huā maiñ
har shaḳhs hiqārat se mujhe dekh rahā hai
jaise kisī mazlūm kī fariyād huā maiñ