fareb-e-ḳhūbī-e-nairañg dekhne ke liye

nikal paḌā huuñ tire sañg dekhne ke liye

ta.assubāt ke chehre pe ab hai ḳhush-hālī

lahū ke rañg ko be-rañg dekhne ke liye

zarā shu.ūr kī āñkheñ to kholiye sāhab

kamāl-e-zabt kā āhañg dekhne ke liye

nigār-ḳhāna-e-fan ke jamāl kī saugandh

maiñ aa gayā huuñ tire Dhañg dekhne ke liye

ta.alluqāt kā lohā to gal chukā hogā

palaT ke aa.e ho ab zañg dekhne ke liye