jahāñ ḳharāb sahī ham badan-darīda sahī
tirī talāsh meñ nikle haiñ pā-burīda sahī
jahān-e-sher meñ merī ka.ī riyāsateñ haiñ
maiñ apne shahr meñ gumnām o nā-shunīda sahī
bhale hī chhāñv na de aasrā to detā hai
ye aarzū kā shajar hai ḳhizāñ-rasīda sahī
inhī bujhī huī āñkhoñ meñ ḳhvāb utreñge
yaqīñ na chhoḌ ye bīmār o shab-guzīda sahī
diloñ ko joḌne vaalī ġhazal salāmat hai
ta.alluqāt hamāre bhale kashīda sahī