ba-qadr-e-paimāna-e-taḳhayyul surūr har dil meñ hai ḳhudī kā

agar na ho ye fareb-e-paiham to dam nikal jaa.e aadmī kā

bas ek ehsās-e-nā-rasā.ī na josh is meñ na hosh us ko

junūñ pe hālat rubūdgī kī ḳhirad pe aalam ġhunūdgī kā

hai ruuh tārīkiyoñ meñ hairāñ bujhā huā hai charāġh-e-manzil

kahīñ sar-e-rāh ye musāfir paTak na de bojh zindagī kā

ḳhudā kī rahmat pe bhuul baiThūñ yahī na ma.anī hai is ke vaa.iz

vo abr kā muntazir khaḌā ho makān jaltā ho jab kisī kā

vo laakh jhukvā le sar ko mere magar ye dil ab nahīñ jhukegā

ki kibriyā.ī se bhī ziyāda mizāj nāzuk hai bandagī kā

'jamīl' hairat meñ hai zamāna mire taġhazzul kī muflisī par

na jazba-e-ijtiba-e-rizvī na kaif 'parvez-shāhidī' kā