tū ne siine ko jab tak ḳhalish dī na thī tū ne jazboñ ko jab tak ubhārā na thā
maiñ vo dariyā thā jis meñ ki lahreñ na thiiñ maiñ vo qulzum thā jis meñ ki dhārā na thā
tere aage na yārān-e-ḳhud-sar jhuke terī chaukhaT se bhāge to dar dar jhuke
us jagah dil jhuke us jagah sar jhuke bandagī ke sivā koī chārā na thā
ashk motī na the bah ga.e bah ga.e hañste hañste ye tum aaj kyā kah ga.e
yaad kar ke vo din ham bhī chup rah ga.e jab in āñkhoñ meñ aañsū gavārā na thā
saaz fariyād ke dil ne chheḌe na the hijr aur vasl ke ye bakheḌe na the
ham ne dāman ke baḳhiye udheḌe na the tum ne zulfoñ ko apnī sañvārā na thā
tujh meñ dariyā koī kis sahāre chale maiñ jo pachchhim to pūrab ko dhāre chale
merī kashtī kināre kināre chale terī maujoñ ko ye bhī gavārā na thā
dekh parvānoñ ke raqs-e-betāb ko sham.a aane na de aañkh meñ ḳhvāb ko
ek jhapkī sī aa.ī thī mahtāb ko aañkh kholī to koī sitārā na thā
ek tannūr se sho.ale uTThā kiye aag jaltī rahī log taapā kiye
duur baiThe vo pahlū bachāyā kiye jin kī qismat meñ koī sharārā na thā
donoñ afsāna-ḳhvāñ gird mahmil ke the qais sahrā kā thā ḳhizr manzil ke the
'maz.harī' bhī ġhulām apne hī dil ke the in divānoñ meñ koī tumhārā na thā