ishq meñ dil ban ke dīvāna chalā
āshnā se ho ke begāna chalā
qulqul-e-mīnā se aatī hai sadā
bhar chukā jis vaqt paimāna chalā
be-zabānoñ ko bhī aa.ī hai zabāñ
beḌī ġhul kartī hai dīvāna chalā
ishq-bāzī bāzī-e-shatrañj hai
chaal nādāñ rah gayā daana chalā
shab jo aayā bazm meñ vo shola-rū
sham.a gul karne ko parvāna chalā
bū-e-gul ġhuncha se kahtī hai 'nasīm'
baat niklī muñh se afsāna chalā