zindagī bas vo zindagī hogī

jo kisī hijr meñ kaTī hogī

umr-e-rafta ke ġham meñ kyoñ ro.eñ

terī dahlīz par paḌī hogī

aap kī diid aur chashm-e-faqīr

kis qayāmat kī vo ghaḌī hogī

chāroñ jānib se tiir aa rahe the

shist to aap ne bhī lī hogī

mujh pe āvāze kasne vāloñ meñ

ik numāyāñ sadā tirī hogī

raunaq-e-rāh meñ na gum honā

aglī manzil bahut kaḌī hogī

dil kī sham.eñ jalā rakho pyāre

aadh raste meñ raat bhī hogī

ham jise maut gin rahe haiñ yahāñ

duuje aalam meñ zindagī hogī