lene lage jo chuTkī yak-bār baiThe baiThe
ye chheḌ kyā nikālī ai yaar baiThe baiThe
kal va.ada-gāh meñ jab vo bevafā na aayā
uktā ke uTh ga.e ham nā-chār baiThe baiThe
jo kuchh paḌhā hai ham ne ham āphī-āp us kī
ghar meñ kiyā kareñ haiñ takrār baiThe baiThe
ham ne to us ko hargiz yaaro kahā na thā kuchh
kuchh yūñhī ho gayā vo bezār baiThe baiThe
tujh bin to ham ne ve bhī bā-ḳhāmoshī adā kiiñ
yaad ā.ī.āñ jo bāteñ do-chār baiThe baiThe
ai 'mus.hafī' unhīñ meñ san.at nahīñ kuchh apnī
likh Daale ham ne kal ye ash.ār baiThe baiThe