in āñkhoñ se aab kuchh na niklā

ġhair-az ḳhūñ-nāb kuchh na niklā

bose kā kyā savāl lekin

us muñh se javāb kuchh na niklā

bāham huī yuuñ to dīd-vā-dīd

par dil kā hijāb kuchh na niklā

juz terī havā ke apne sar meñ

mānind-e-habāb kuchh na niklā

kartā thā bahut sā mujh pe da.avā

par vaqt-e-hisāb kuchh na niklā

siine meñ jo dil kī kī tafahhus

juz dūd-e-kabāb kuchh na niklā

ham samjhe the jis ko 'mus.hafī' yaar

vo ḳhāna-ḳharāb kuchh na niklā