mire charāġho mirā ganj-e-be-karāñ le lo
maiñ jā rahā huuñ mirī raushni-e-jāñ le lo
qarīb hai mire ḳhākī libās kī tahlīl
mire dimāġh mire dil mirī zabāñ le lo
hai merī āñkhoñ meñ aks-e-navishta-e-dīvār
samajh sako to mirā nutq-e-be-e-zabāñ le lo
mirī jabīñ pe munaqqash haiñ rāstoñ ke charāġh
bhaTak na jaao ye dastūr-e-chīstāñ le lo
rahīn-e-dasht huuñ sahrā kā rāz-dāñ huuñ maiñ
rumūz-e-dasht bayābāñ kī boliyāñ le lo
huuñ vārdāt kā ainī gavāh maiñ mujh se
ye merī maut se pahle mirā bayāñ le lo