taḳhta-e-āb-e-chaman kyuuñ na nazar aave sapāT
yaad aave mujhe jis dam vo nigammūd kā ghaaT
zindagānī kā maza zer-e-falak ab na rahā
yā-rab aisā ho ki mil jaa.e kahīñ paaT se paaT
fann-e-kashtī meñ qayāmat hai vo but gāzir kā
dhuum detā hai machā aave hai jab dhobī paaT
jaate hī vādi-e-vahshat meñ qadam maarā maiñ
chaman-e-dahr se dil apnā huā jab ki uchāT
ḳhāk-e-dehlī meñ kyā jab se nasārā ne amal
shor-e-gūjar hī rahā aur na hañgāma-e-jāT
tark ġhamze kā magar bar-sare-e-saffākī hai
us ke kūche se chalī aatī hai jab khaaT pe khaaT
qatl-e-āshiq kā jo hotā hai irāda us ko
pahle dekhe hai ḳhar o gaav pe talvār kā kaaT
koī sīkhe bhī qanā.at ko to sag se sīkhe
paḌ rahe hai vo ba-yak gosha diyā raat ko chaaT
roz hañgāma hai is gumbad-e-nīlī ke ta.iiñ
'mus.hafī' shak nahīñ bigḌā hai magar niil kā maaT