havas kā rañg chaḌhā us pe aur utar bhī gayā

vo ḳhud hī jam.a huā aur ḳhud bikhar bhī gayā

thī zindagī mirī rāhoñ ke pech-o-ḳham kī asiir

magar maiñ raat ke hamrāh apne ghar bhī gayā

maiñ dushmanoñ meñ bhī ghir kar niDar rahā lekin

ḳhud apne jazba-e-haivāniyat se Dar bhī gayā

mire lahū kī talab ne mujhe tabāh kiyā

havas meñ sañg kī hāthoñ se mere sar bhī gayā

hai lafz-o-ma.anī kā rishta zavāl-āmāda

ḳhayāl paidā huā bhī na thā ki mar bhī gayā

sila ye manzil-e-maqsūd kā milā 'shādāb'

safar tamām huā aur ham-safar bhī gayā