aatā hai yahī jī meñ fariyād karūñ ro.uuñ
rone hī se Tuk apnā dil shaad karūñ ro.uuñ
kis vāste baiThā hai chup itnā tū ai hamdam
kyā maiñ hī koī nauha buniyād karūñ ro.uuñ
yuuñ dil meñ guzartā hai jā kar kisī sahrā meñ
ḳhātir ko Tuk ik ġham se āzād karūñ ro.uuñ
is vāste furqat meñ jiitā mujhe rakkhā hai
ya.anī maiñ tirī sūrat jab yaad karūñ ro.uuñ
ai 'mus.hafī' aatā hai ye dil meñ ki ab maiñ bhī
rone meñ tujhe apnā ustād karūñ ro.uuñ