naḳhl laale jā jab zamīñ se uThā

sho.ala ik do vajab zamīñ se uThā

tū jo kal ḳhāk-e-kushtagāñ se gayā

shor us dam ajab zamīñ se uThā

baiThe baiThe jo ho gayā vo khaḌā

ik sitāra sā shab zamīñ se uThā

qad vo buuTā sā dekh kahtī hai ḳhalq

ye to paudā ajab zamīñ se uThā

tishna sahbā-e-vasl kā terī

hashr ko ḳhushk-lab zamīñ se uThā

baiTh kar uTh gayā jahāñ vo shoḳh

fitna vaañ jab na tab zamīñ se uThā

sochtā kyā hai dekh dekh use

bin uThā.e vo kab zamīñ se uThā

thī qazā yūñhī tere kushte kī

laash ko us kī ab zamīñ se uThā

gul nahīñ 'mus.hafī' kā dil hai ye

us ko ai be-adab zamīñ se uThā