ḳhudā se zulm kā shikva zarūr maiñ ne kiyā

baḌā qusūr ye ai rashk-e-hūr maiñ ne kiyā

kisī se dil kā lagānā gunāh hai nāseh

jo ye qusūr hai to ye qusūr maiñ ne kiyā

vo zikr-e-va.ada-e-vasl-e-adū pe kahte haiñ

zarūr maiñ ne kiyā bizzarūr maiñ ne kiyā

tirā ḳhayāl mire dil meñ aa nahīñ saktā

ki jis ko duur kiyā us ko duur maiñ ne kiyā

janāb-e-'nūh' zamāne kā e'tibār nahīñ

burā kiyā jo kisī se ġhurūr maiñ ne kiyā