donoñ gharoñ kā lutf judāgāna mil gayā

ka.abe se ham chale the ki but-ḳhāna mil gayā

saaqī se yuuñ subūt-e-karīmāna mil gayā

paimāna maiñ ne māñgā thā mai-ḳhāna mil gayā

dil kyuuñ na ham faroḳht kareñ is yaqīn par

qīmat bhī ab milegī jo bai.āna mil gayā

saaqī kī chashm-e-mast idhar aaj uTh ga.ī

ham ko hamāre zarf kā paimāna mil gayā

karnī paḌī na aur kahīñ justujū mujhe

ka.abe hī ke hudūd meñ but-ḳhāna mil gayā

mahshar meñ dekh kar unheñ yuuñ shaad ho ga.e

goyā hameñ najāt kā parvāna mil gayā

mil kar bhī jal gayā ki bachā ye na pūchhiye

itnā huā ki sham.a se parvāna mil gayā

ab dar-ba-dar kī Thokareñ khāne se kyā ġharaz

mujh ko ḳhudā-e-ka.aba-o-but-ḳhāna mil gayā

allāh re chashm-e-sāqī-e-mahfil kā lutf-e-ḳhās

sab yuuñ hī rah ga.e mujhe paimāna mil gayā

vo ḳhat meñ likh rahe haiñ tirī āfiyat nahīñ

mujh ko adam kī raah kā parvāna mil gayā

ai sāilkān-e-jāda-e-irfāñ baḌhe chalo

but-ḳhāna mil gayā to ḳhudā-ḳhāna mil gayā

tauqīr-e-ishq ḳhaak uḌāne se baḌh ga.ī

ye hai ġhalat ki ḳhaak meñ dīvāna mil gayā

paa.e uruuj kyuuñ na hamārī farotanī

phūlā phalā vo ḳhaak meñ jo daana mil gayā

josh-e-junūñ ke vāste ab kuchh na chāhiye

vīrāne kī talāsh thī vīrāna mil gayā

paimāna-o-subū kī zarūrat nahīñ rahī

mujh ko mizāj-e-sāqī-e-mai-ḳhāna mil gayā

marqad se kushtagān-e-mohabbat nikal chuke

ab hashr tak ke vāste kāshāna mil gayā

ma.alūm ham ne kar liye asrār-e-husn-o-ishq

taqdīr se agar koī dīvāna mil gayā

rakh lī ḳhudā-e-ishq ne josh-e-junūñ kī sharm

ghar se nikalte hī mujhe vīrāna mil gayā

vo kah ga.e ki phir koī tūfān uThā.e

ai 'nūh' mujh ko shaġhl-e-qadīmāna mil gayā