guzar jā.eñge ye din bebasī ke
zamāne lauT ā.eñge ḳhushī ke
uTho aur bandagī kar lo ḳhudā kī
guzar jaa.eñ na lamhe bandagī ke
ḳhudā kī zaat par rakkheñ bharosa
bharegā vo ḳhazāne har kisī ke
hamesha vāsta nekī se rakhnā
na jaanā paas hargiz tum badī ke
huī hai sham.a gul ab pyaar vaalī
jaleñ kaise diye ab zindagī ke
bharosa hai ḳhudā kī rahmatoñ par
to kyuuñ phailā.eñ haath aage kisī ke
ḳhudā mahfūz rakkhe har balā se
chalan achchhe nahīñ haiñ is sadī ke
nazar nīchī ye māthe kī matānat
maiñ qurbāñ aap kī us sādgī ke