ai dard na tham sar aur uThā dil chāragarī kī raah na tak

dekh ashk-fishāñ hai ab tujh par sahrāoñ meñ dīvāna tak

tum lauT chuke ho gar to kaho yā baaqī hai armān abhī

pahle hī tumheñ ham de baiThe haiñ jaan kā ye nazrāna tak

sahrā meñ base sab dīvāne shahroñ meñ bhī mahshar hai barpā

allāh tirī is ḳhilqat se baaqī na rahā vīrāna tak

timsāl pe ḳhūn-e-nāhaq bhī aur ātish-e-zulm-o-jaur bhī hai

Duubī huī chashm-e-shauq bhī hai ḳhush-rañg ruḳh-e-jānāna tak

khiḌkī darvāze band karo masnad bhī sameTo ai logo

mutrib bhī ga.e sham.eñ bhī bujhīñ aur ḳhatm huā afsāna tak