duniyā ke liye zahr na khāleñ koī ham bhī
is baat pe phir shart lagā leñ koī ham bhī
bahtī huī gañgā tire paanī meñ nahā kar
apne liye nekī na kamā leñ koī ham bhī
lagtā hai yahī vaise guzāra nahīñ hogā
jhūTī hī sahī baat banā leñ koī ham bhī
har saal manā.egī baḌī dhuum se duniyā
is ishq ko tyauhār banā leñ koī ham bhī
dil meñ liye phirte haiñ bas itnī sī ye ḳhvāhish
bāloñ meñ tire phuul lagā leñ koī ham bhī
tū baat nahīñ suntā yahī hal hai phir is kā
jhagḌe ke liye vaqt nikāleñ koī ham bhī