kisī ke naam pe nanhe diye jalāte hue
ḳhudā ko bhuul ga.e nekiyāñ kamāte hue
vagarna baat hamārī samajh se bāhar thī
ye ishq ho gayā bas rūThte manāte hue
hamārī vāpsī āsāñ nahīñ yaqīñ maano
yahāñ tak aa.e haiñ ham kashtiyāñ jalāte hue
unheñ aziiz hai jiinā jo jī rahe haiñ yahāñ
mazāq ban ke ḳhud apnā mazāq uḌāte hue
bhaḌās dil kī nikālī ga.ī kuchh aise bhī
duā.eñ māñgī ga.iiñ chīḳhte chillāte hue
maiñ ghir gayā huuñ yahāñ par bahut se apnoñ meñ
tire liye sabhī kuchh daav par lagāte hue