kuchh ajnabī se log the kuchh ajnabī se ham

duniyā meñ ho na paa.e shanāsā kisī se ham

dete nahīñ sujhā.ī jo duniyā ke ḳhatt-o-ḳhāl

aa.e haiñ tīrgī meñ magar raushnī se ham

yaañ to har ik qadam pe ḳhalal hai havās kā

ai ḳhizr baaz aa.e tirī hamrahī se ham

dete haiñ log aaj use shā.erī kā naam

paḌhte the lauh dil pe kuchh āshuftagī se ham

rahtī hai 'anjum' ek zamāne se guftugū

karte nahīñ kalām ba-zāhir kisī se ham