dil hai yā mele meñ khoyā huā bachcha koī
jis ko bahlā nahīñ saktā hai khilaunā koī
maiñ to jalte hue zaḳhmoñ ke tale rahtī huuñ
tū ne dekhā hai kabhī dhuup kā sahrā koī
maiñ lahū huuñ to koī aur bhī zaḳhmī hogā
apnī dahlīz pe pheñko to na shīsha koī
ḳhvāhisheñ dil meñ machal kar yūñhī so jaatī haiñ
jaise añgnā.ī meñ rotā huā bachcha koī
zā.iche tū ne umīdoñ ke banā.e the magar
miT ga.e harf girā āñkhoñ se qatra koī
chāñdnī jab bhī utartī hai mire āñgan meñ
kholtā hai tirī yādoñ kā darīcha koī
merā ghar jis ke dar-o-bām bhī mehmān se the
kaash is ujḌe hue ghar meñ na aatā koī
dil koī phuul nahīñ hai ki agar toḌ diyā
shāḳh par is se bhī khil jā.egā achchhā koī
tum bhare shahr meñ afkār liye phirte ho
sab to muflis haiñ ḳharīdegā yahāñ kyā koī
raat tanhā.ī ke mele meñ mire saath thā vo
varna yuuñ ghar se nikaltā hai akelā koī
'āfrīñ' dard kā ehsās miTā hai aise
jaise bachpan meñ banāyā thā gharauñdā koī