log hañsne ke liye rote haiñ akasr dahr meñ

talḳhiyāñ ḳhud hī milā lete haiñ mīThe zahr meñ

pyaar ke chashmoñ kā paanī jab se khārā ho gayā

saarī duniyā ghir ga.ī hai nafratoñ ke qahr meñ

vaqt kahtā hai ubharte Dūbte chehroñ ko dekh

aaj to raunaq baḌī hai hādsoñ kī nahr meñ

jaane ye hiddat chaman ko raas aa.e yā nahīñ

aag jaisī kaifiyat hai ḳhushbuoñ kī lahr meñ

ham ne palkoñ par sajā rakhe haiñ ashkoñ ke charāġh

ek mela sā lagā hai raushnī ke shahr meñ

chand āvāzeñ ta.āqub meñ haiñ 'afzal' aaj bhī

qurbatoñ kā shahd hai tanhā.iyoñ ke zahr meñ