ik qabīle se haiñ lekin rañg-o-naqsha aur hai

aur hai kāñToñ kī duniyā gul kī duniyā aur hai

ishtirāk-e-fikr ho kaise hamāre darmiyāñ

terī ḳhvāhish aur hai merī tamannā aur hai

aur hī manzar hai duniyā kā sar-e-tūr-e-nazar

chashm-e-dil ke sāmne lekin tamāshā aur hai

aarzū ke bahr-o-dariyā kī kahānī kyā kahūñ

is kā sāhil aur hai is kā kinārā aur hai

dekhnā tūfān meñ ghir kar na rah jaa.e kahīñ

nāḳhudā ye ārzuoñ kā safīna aur hai

ab badalnā hī paḌegā ye tarīq-e-zindagī

ab mirī jaañ sūrat-e-hālāt-e-duniyā aur hai

dushmanoñ kā haath is meñ hai na yāroñ kā qusūr

inqitā-e-dostī kā shāḳhsāna aur hai

zindagī ke moḌ par 'shāhid' mileñ phir kis tarah

us kā rasta muḳhtalif hai merā rasta aur hai