shauq āsūda-e-tahlīl-e-muammā na huā
terā bīmār tilismāt se achchhā na huā
tū ne de kar mujhe jo ḳhvāb utārā thā yahāñ
in meñ ik ḳhvāb bhī terā koī sachchā na huā
imtedād-e-sahar-o-shām zamānoñ kī qasam
ek bhī rañg mire pyaar kā phīkā na huā
shauq-e-behad ne kisī gaam Thaharne na diyā
varna kis gaam mirā ḳhūn-e-tamannā na huā
nāfa-e-mushk ne pīchhā nahīñ chhoḌā 'sālim'
mujh sā haivāñ koī jañgal meñ divāna na huā