kafan jab sī rahe the log merā
mujhe lagtā thā lahñgā ban rahā hai
hamāre saañs hoñge dukh kā sālan
hamārā dil jo chūlhā ban rahā hai
tirī maujūdgī hai be-ma.ānī
tirā honā na honā ban rahā hai
mirī har raat nīñdoñ se ḳhafā hai
mirā har ḳhvāb katba ban rahā hai
vo apnī qadr ab khone lagā hai
vo ab tole se māsha ban rahā hai
falak juuḌe tale rakkhā huā hai
sitāroñ se prānda ban rahā hai
hamāre shahr kā ahvāl mat pūchh
hamārā shahr kuufa ban rahā hai