raushnī jab māñgte haiñ ye diye kī lau se pūchh
kyoñ añdhere kāñpte haiñ ye diye kī lau se pūchh
ishq karnā hai to pahle ishq ke ādāb siikh
raat kaise kāTte haiñ ye diye kī lau se pūchh
kaun sā ġham hai ki yūñhī chāñd taare mere saath
raat kaise jāgte haiñ ye diye kī lau se pūchh
ham shab-e-tanhā.ī meñ karte haiñ apnā hī tavāf
saa.e kaise bhāgte haiñ ye diye kī lau se pūchh
ek ik lamha jalā kar ḳhud ko tere hijr meñ
vaqt kaise māpte haiñ ye diye kī lau se pūchh
dūsroñ ke vāste jiite haiñ kaise 'sa.adiya'
ḳhud ko kaise mārte haiñ ye diye kī lau se pūchh