vafā ne jhuum ke jab tere giit gaa.e haiñ

qadam ufuq pe andheroñ ke laḌkhaḌā.e haiñ

tire qarīb pahuñch kar bhī kam nahīñ hote

ġham-e-hayāt ne jo fāsle baḌhā.e haiñ

bahut tavīl sahī rāh-e-justujū lekin

bahut hasīn tire gesuoñ ke saa.e haiñ

tirī nigāh mudāvā na ban sakī jin kā

tirī talāsh meñ aise bhī zaḳhm khaa.e haiñ

paḌā hai aks jo ruḳhsār-e-shola-e-mai kā

to ā.īne tirī yādoñ ke jagmagā.e haiñ

musāfirān-e-shab-e-ġham kī raah meñ 'jāmī'

na.e charāġh mirī fikr ne jalā.e haiñ