shabnam meñ chāñdnī meñ gulāboñ meñ aa.egā
ab terā zikr saarī kitāboñ meñ aa.egā
jo lamha kho gayā hai use phir na DhūñDhnā
jo chāñd Dhal chukā hai vo ḳhvāboñ meñ aa.egā
dukh de rahī haiñ us kī ye barfīlī ādateñ
pighlegā ek din to sharāboñ meñ aa.egā
pahchān bhī sakoge nahīñ apne naam ko
aa.egā bhī to itne hijāboñ meñ aa.egā
jab terā naam husn kī tārīḳh ban gayā
phir merā zikr dil kī kitāboñ meñ aa.egā