jab ḳhizāñ ke chehre piile ho ga.e

baaġh ke sab phal rasīle ho ga.e

zikr terā jab chhiḌā jān-e-suḳhan

talḳh lahje bhī surīle ho ga.e

jab chaḌhī us par javānī kī parat

zāviye us ke kaTīle ho ga.e

terī furqat ne ghulā kar rakh diyā

mere sab malbūs Dhīle ho ga.e

'mīr' kā dīvān ghar meñ kyā rakhā

bām-o-dar ashkoñ se giile ho ga.e

chand zarre bad-gumānī ke the jo

nafratoñ ke ab vo Tiile ho ga.e

fāsle jo the hamāre darmiyāñ

qurbatoñ ke ab vasīle ho ga.e

ham ne jo āsāniyoñ ke gul chune

ḳhaar se baḌh kar nukīle ho ga.e