khaTkhaTātā hai dar-e-dil kī bhalā zanjīr kaun
de rahā hai mere ḳhvāboñ ko na.ī ta.abīr kaun
merī āñkhoñ ke havāle se mire ruḳhsār par
likh gayā kājal se apne dard kī tahrīr kaun
jis ko paane ke liye mar mar ke jiite haiñ sabhī
qabr tak le kar gayā duniyā kī vo jāgīr kaun
jab ḳhudā ne hī nahīñ likkhā use mere liye
us ko duniyā meñ banā detā mirī taqdīr kaun
vo jo kahte the mohabbat nafratoñ kā hai javāb
un laboñ par rakh gayā nafrat bujhī shamshīr kaun
ye zamīñ sabza ye paanī āsmāñ shams-o-qamar
kaun hai in kā musavvir hai pas-e-tasvīr kaun
mujh ko baḳhshā hai ḳhudā ne jab ye ġhazloñ kā hunar
mere fan kī phir ghaTā.egā bhalā tauqīr kaun
falsafa 'ġhālib' ke jaisā kaun likkhegā 'hinā'
bhar sakegā shā.irī meñ phir se rañg-e-'mīr' kaun