merī tahrīroñ kā mahvar ek be-sar fāḳhta
merā naara ḳhāmushī merā payambar fāḳhta
ek āñgan qahqahoñ aur siskiyoñ se be-ḳhabar
chhat pe ik parcham phaTā sā aur dar par fāḳhta
tere rastoñ kī rukāvaT shāḳh ik zaitūn kī
tere aivānoñ ke andar jāgtā Dar fāḳhta
shaam pyārī shaam us par bhī koī dar khol de
shāḳh par baiThī huī hai ek beghar fāḳhta
ek jānib ujle paanī kā bulāvā aur huā
dūsrī samt ik akelī aur be-par fāḳhta