muhīb raat ke gunjān pāniyoñ se nikal
na.ī sahar ke sitāre tū chimniyoñ se nikal
har ek had se pare apnā boriyā le jā
badī kā naam na le aur nekiyoñ se nikal
ai mere mehr tū us kī chhatoñ pe āḳhir ho
ai mere maah tū aaj us kī khiḌkiyoñ se nikal
nikal ke dekh tirī muntazir qatār qatār
aziiz dāna-e-gandum tū boriyoñ se nikal
tū merī nazm ke asrār meñ huvaidā ho
tū mere kashf kī nādīda ghāTiyoñ se nikal
ai pichhlī umr idhar sūkhī pattiyoñ meñ aa
ai agle saal bujhī mom-battiyoñ se nikal