koī kahānī koī vāqi.a sunā to sahī
agar hañsā nahīñ saktā mujhe rulā to sahī
kisī ke hijr kā chhallā kisī visāl kī chhāp
bichhaḌ ke mujh se tujhe kyā milā dikhā to sahī
kabhī bulā to sahī apne āstāne par
mujhe bhī apnā koī mo.ajaza dikhā to sahī
maiñ ḳhuud se chhup ke tujhe pyaar karne ā.ūñgā
tū ek baar mujhe bhuul kar bulā to sahī
kise ḳhabar yahīñ terā shikār ho 'jāved'
tū chand tiir añdhere meñ hī chalā to sahī