havā chalegī magar sitārā nahīñ chalegā
samundaroñ meñ tirā ishārā nahīñ chalegā
yahī raheñge ye dar ye galiyāñ yahī raheñgī
tumhī chaloge koī nazāra nahīñ chalegā
shab-e-safar hai hatheliyoñ par bhañvar ugeñge
tumhāre ham-rāh ab kinārā nahīñ chalegā
suno ki ab ham gulāb deñge gulāb leñge
mohabbatoñ meñ koī ḳhasāra nahīñ chalegā
bahār maqrūz hai gharoñ aur maqbaroñ kī
guloñ pe rastoñ kā hī ijāra nahīñ chalegā