hue mujh se jis ghaḌī tum judā tumheñ yaad ho ki na yaad ho

mirī har nazar thī ik iltijā tumheñ yaad ho ki na yaad ho

vo tumhārā kahnā ki jā.eñge agar aa sake to phir ā.eñge

use ik zamāna guzar gayā tumheñ yaad ho ki na yaad ho

mirī be-qarāriyāñ dekh kar mujhe tum ne dī thiiñ tasalliyāñ

mirā chehra phir bhī udaas thā tumheñ yaad ho ki na yaad ho

mirī bebasī ne zabān tak jise lā ke tum ko rulā diyā

mire TuuTe saaz kī vo sadā tumheñ yaad ho ki na yaad ho

tumheñ chand qatra-e-ashk bhī kiye pesh jis ke javāb meñ

vo salām nīchī nigāh kā tumheñ yaad ho ki na yaad ho

mire shāne par yahī zulf thī jo hai aaj mujh se khiñchī khiñchī

mire haath meñ yahī haath thā tumheñ yaad ho ki na yaad ho

kabhī haath meñ jo sharāb lī vahīñ tum ne chhīn ke pheñk dī

mujhe yaad hai mire pārsā tumheñ yaad ho ki na yaad ho

kahīñ tum ko jaanā huā agar na ga.e baġhair 'nazīr' ke

vo zamāna apne 'nazīr' kā tumheñ yaad ho ki na yaad ho