ek hai phir bhī hai ḳhudā sab kā

is kā us kā mirā tirā sab kā

husn-e-mastūr ko ayaañ kar de

ek ho jaa.e mudda.ā sab kā

jurm-e-dil kī sazā milī mujh ko

maiñ ne paayā liyā diyā sab kā

naza.a meñ de ga.e javāb havās

e.atibār aaj uTh gayā sab kā

ek begāna-ḳhū ko dil de kar

maiñ gunāhgār ho gayā sab kā

maiñ kisī kā nahīñ sivā jis ke

haa.e vo hai mire sivā sab kā

aisī kyā ho ga.ī ḳhatā mujh se

mujh pe hai jaur-e-nā-ravā sab kā

sab ko chhoḌā hai maiñ ne jis ke liye

vo sitamgar hai āshnā sab kā

ek manzil hai ai 'nasīm' magar

jāda-e-shauq hai judā sab kā