hañsī laboñ pe sajā.e udaas rahtā hai

ye kaun hai jo mire ghar ke paas rahtā hai

ye aur baat ki miltā nahīñ koī us se

magar vo shaḳhs sarāpā sipās rahtā hai

jahāñ pe Duub gayā merī aas kā sūraj

usī jagah vo sitāra-shanās rahtā hai

guzar rahā huuñ maiñ saudā-garoñ kī bastī se

badan pe dekhiye kab tak libās rahtā hai

likhī hai kis ne ye tahrīr reg-e-sāhil par

bahut dinoñ se samundar udaas rahtā hai

maiñ vahshatoñ ke safar meñ bhī huuñ kahāñ tanhā

yahī gumāñ hai koī ās-pās rahtā hai

maiñ guftugū ke har andāz ko samajhtā huuñ

ki merī zaat meñ lahja-shanās rahtā hai

vo fāsloñ meñ bhī rakhtā hai rañg qurbat ke

nazar se duur sahī dil ke paas rahtā hai

jab un se guftugū kartā hai koī bhī 'ejāz'

ik iltimās pas-e-iltimās rahtā hai