maiñ vahāñ huuñ ki nahīñ chāhe to jā kar dekhe
kūza-gar ḳhud mirī miTTī meñ samā kar dekhe
baad meñ rakhe sarāboñ ke dayāroñ meñ qadam
pahle vo saañs kī sarhad pe to aa kar dekhe
mire iz.hār ko kuchh aur samar-var kar de
vo mujhe lams kī shāḳhoñ pe ugā kar dekhe
guuñj uTThe koī khoī huī duniyā shāyad
mire ḳhaliyoñ meñ vo āvāz lagā kar dekhe
dekheñ phir raqs meñ aate haiñ bhañvar kitne 'riyāz'
koī paanī pe mirā naam bahā kar dekhe