ret hai iz.hār ke paanī ke paar
aur vīrānī hai vīrānī ke paar
maut kī tashkīl se ubhrā huā
kaun hai merī farāvānī ke paar
aa na paa.ī mujh talak ye kā.enāt
rah ga.ī sāñsoñ kī tuġhyānī ke paar
phail kar tujh meñ na bas jā.ūñ kahīñ
rañg mujh ko rañg-e-imkānī ke paar
kaun phūTegā adam kī kokh se
kaun lā-fānī hai lā-fānī ke paar
chhoḌ ab mafhūm kī ujḌī qabā
kuchh nahīñ ma.anī kī uryānī ke paar