raat ke vaqt koī giit sunātī hai havā
shāḳh-dar-shāḳh bhalā kis ko bulātī hai havā
sard raat apnī nahīñ kaTtī kabhī tere baġhair
aise mausam meñ to aur aag lagātī hai havā
ek mānūs sī ḳhushbū se mahaktī hai fazā
jab tū aatā hai bahut shor machātī hai havā
kin guzargāhoñ ke haiñ gard-o-ġhubār āñkhoñ meñ
roz patjhaḌ ke hameñ ḳhvāb dikhātī hai havā
zindagī jaltā huā ek diyā hai 'anjum'
dekhnā ye hai kahāñ jā ke bujhātī hai havā