sū-e-mai-kada na jaate to kuchh aur baat hotī
vo nigāh se pilāte to kuchh aur baat hotī
go havā-e-gulsitāñ ne mire dil kī laaj rakh lī
vo naqāb ḳhud uThāte to kuchh aur baat hotī
ye bajā kalī ne khil kar kiyā gulsitāñ mo.attar
agar aap muskurāte to kuchh aur baat hotī
ye khule khule se gesū inheñ laakh tū sañvāre
mire haath se sañvarte to kuchh aur baat hotī
go haram ke rāste se vo pahuñch ga.e ḳhudā tak
tirī rahguzar se jaate to kuchh aur baat hotī