churāne ko churā laayā maiñ jalve rū-e-raushan se

magar ab bijliyāñ lipTī huī haiñ dil ke dāman se

tanavvo kuchh to ho ai bulbul-e-kam-zauq mātam kyā

agar tāmīr-e-sahrā ho ga.ī taḳhrīb gulshan se

mujhe kuchh tajrabe har rañg ke jholī meñ rakh chalnā

musāfir huuñ ġharaz kyā hai mujhe sahrā o gulshan se

mujhe har kārvāñ se chhūTnā is bad-gumānī meñ

ki shāyad rāhbar ko rabt-e-pinhānī ho rahzan se

mazāq-e-jazb-e-bātin gum hai ab taz.īn-e-zāhir meñ

ye tifl-e-dasht-e-aiman ghaT gayā tahzīb-e-gulshan se