tuur vaale tirī tanvīr liye baiThe haiñ
ham tujhī ko but-e-be-pīr liye baiThe haiñ
jigar o dil kī na pūchho jigar o dil mere
nigah-e-nāz ke do tiir liye baiThe haiñ
in ke gesū dil-e-ushshāq phañsāne ke liye
jā-ba-jā halqa-e-zanjīr liye baiThe haiñ
ai tirī shaan ki qatroñ meñ hai dariyā jaarī
zarre ḳhurshīd kī tanvīr liye baiThe haiñ
phir vo kyā chiiz hai jo dil meñ utar jaatī hai
teġh paas un ke na vo tiir liye baiThe haiñ
mai-e-ishrat se bhare jaate haiñ aġhyār ke jaam
ham tahī kāsa-e-taqdīr liye baiThe haiñ
kishvar o ishq meñ muhtāj kahāñ haiñ 'bedam'
qais o farhād kī jāgīr liye baiThe haiñ