tirā niyāz-mand huuñ niyāz ke baġhair bhī
dalīl ke baġhair bhī javāz ke baġhair bhī
misāl kyā ki sar-ba-sar tirā vajūd shā.erī
kalām ke baġhair bhī bayāz ke baġhair bhī
tirī talab kā fāsla ḳhalish ne tai karā diyā
sulūk ke baġhair bhī lihāz ke baġhair bhī
guzar rahī thī zindagī guzar rahī hai zindagī
nasheb ke baġhair bhī farāz ke baġhair bhī
tirī nigāh-e-ḳhud-nigar diloñ ko maat kar ga.ī
laḌā.ī ke baġhair bhī mahāz ke baġhair bhī
ravā hai ishq meñ ravā magar ye sajda-e-vafā
azaan ke baġhair bhī namāz ke baġhair bhī