apnī takmīl kar rahā huuñ maiñ
us galī meñ bikhar rahā huuñ maiñ
jitnā jitnā jhukā rahā huuñ sar
utnā utnā ubhar rahā huuñ maiñ
ik sahīfa huuñ āsmānoñ kā
aur zamīñ par utar rahā huuñ maiñ
gardish-e-vaqt roknī hai mujhe
is liye raqs kar rahā huuñ maiñ
qais ke bhī qadam nahīñ haiñ jahāñ
us jagah se guzar rahā huuñ maiñ
pūchh lo mujh se āsmān ke raaz
kuchh dinoñ tak udhar rahā huuñ maiñ